ელექტრონული კატალოგის საშუალებით შესაძლებელია ინფორმაციის მოძიება თუ რომელი მაზრის, რაიონის, ქალაქისა და სოფლის ეკლესიის მეტრიკული  წიგნები ინახება საისტორიო ცენტრალურ არქივში.

 საისტორიო ცენტრალურ არქივში დაცულია საეკლესიო-მეტრიკული წიგნები 1818 წლიდან 1921 წლამდე (ცალკეულ შემთხვევებში ჩანაწერები გვხვდება 1930 წლამდეც). არქივში აღნიშნული დოკუმენტები არასრული სახითაა შემოსული, ნაკლულია როგორც ცალკეულ ეკლესიების, ასე გარკვეული წლების მეტრიკული წიგნები.

საეკლესიო-მეტრიკულ წიგნებში შეტანილია ინფორმაცია აღნიშნულ პერიოდში დაბადებული, ჯვარდაწერილი და გარდაცვლილი პირების შესახებ.

1818 წლიდან 1870 წლამდე მეტრიკული წიგნების ფორმირება ხდებოდა მაზრების მიხედვით. ამ პერიოდში შედგენილი თითოეული საეკლესიო-მეტრიკული წიგნი მოიცავს ერთი მაზრის ტერიტორიაზე არსებული ეკლესიების ერთი წლის განმავლობაში გაკეთებულ ჩანაწერებს დაბადების, ჯვრისწერის და გარდაცვალების შესახებ.

1871 წლიდან 1921 წლამდე შედგენილი მეტრიკული წიგნები გაყოფილია რაიონების მიხედვით. თითოეული საეკლესიო-მეტრიკული წიგნი მოიცავს ერთი რაიონის, ერთი სოფლის ტერიტორიაზე არსებული ეკლესიების ერთი წლის განმავლობაში გაკეთებულ ჩანაწერებს დაბადების, ჯვრისწერის და გარდაცვალების შესახებ.

შესაბამისად, ელექტრონულ კატალოგში მონაცემები დაყოფილია მაზრებისა და რაიონების მიხედვით.