საქართველოს იუსტიციის სამინისტროს ეროვნულ არქივსა და კინემატოგრაფიის ეროვნულ ცენტრს შორის ურთიერთთანამშრომლობის მემორანდუმი გაფორმდა. დოკუმენტს ხელი მოაწერეს ეროვნული არქივის გენერალურმა დირექტორმა თეონა იაშვილმა და კინემატოგრაფიის ეროვნული ცენტრის ხელმძღვანელმა ნანა ჯანელიძემ.
„დღეს გაფორმდა მემორანდუმი, რომლის ფარგლებშიც ეროვნული არქივი და კინოცენტრი კიდევ უფრო ნაყოფიერად ითანამშრომლებენ. ამიერიდან ეროვნულ არქივში იქნება კინოცენტრის დაფინანსებით გადაღებული კინოფილმების ციფრული ასლები, ამ ფილმების სცენარები, აღდგენილი ფილმების ფირები. ეს საშუალებას მოგვცემს, ჩვენს შთამომავლობას შემოვუნახოთ მთლიანად ის კოლექცია, რომელსაც დღეს ქართული კინემატოგრაფია ქმნის კინოცენტრის დახმარებით“, - განაცხადა თეონა იაშვილმა.
„ჩვენ უკვე დიდი ხანია ვთანამშრომლობთ ეროვნულ არქივთან და ვფიქრობ, კიდევ ბევრი ახალი პროექტი გვექნება. ეს მემორანდუმი ძალიან მნიშვნელოვანია, რადგან ის ფილმები, რომლებსაც იღებენ ჩვენი დაფინანსებით, ასევე ფირზე აღდგენილი ფილმები, აუცილებლად უნდა ინახებოდეს ეროვნულ არქივში, სადაც დაცვის განსაკუთრებული პირობებია. ასე ისინი ხელმისაწვდომი იქნება მკვლევარებისა და დაინტერესებული პირებისთვის“, - აღნიშნა ნანა ჯანელიძემ.
ურთიერთთანამშრომლობის მემორანდუმი ითვალისწინებს ყოველი წლის ბოლოს ყველა იმ ფილმის ციფრული ვერსიის თითო ეგზემპლარის, ასევე ფილმების გადაღებასთან დაკავშირებული ფოტომასალის ეროვნული არქივისთვის მუდმივად შესანახად გადაცემას, რომელიც იმ დროისთვის კინოცენტრში იქნება დაცული. გარდა ამისა, არქივს გადაეცემა აღდგენილი ფილმების ციფრული ვერსიების თითო ეგზემპლარი და გამარჯვებული პროექტების ბეჭდური ვერსია. დოკუმენტი, ასევე, ითვალისწინებს უწყებების მიერ ერთობლივი პროექტების განხორციელებას, ინფორმაციის გაცვლასა და სიახლეების გაზიარებას.
აღსანიშნავია, რომ ეროვნულ არქივში 35 000-მდე კინოდოკუმენტი ინახება. კოლექცია მოიცავს დოკუმენტურ ფილმებს, კინოსიუჟეტებს, კინოქრონიკას, კინოჟურნალებსა და მცირე რაოდენობით მხატვრულ ფილმს. კინემატოგრაფიის ეროვნული ცენტრის მიერ ეროვნული არქივისთვის გადაცემული მასალა ფასდაუდებელი შენაძენი იქნება არქივის კინოკოლექციისთვის.