საქართველოს ეროვნულ არქივს დავით აღმაშენებლის სახელობის ეროვნული თავდაცვის აკადემიის კურსანტები ეწვივნენ.
საგამოფენო პავილიონში სტუმრებმა საქართველოს დემოკრატიული რესპუბლიკის შესახებ გამოფენა „საქართველოს დამოუკიდებლობის დღე“ დაათვალიერეს და ამავე თემაზე სამეცნიერო განყოფილების თანამშრომლის, ისტორიკოს დიმიტრი სილაქაძის მცირე ლექცია მოისმინეს. საისტორიო არქივის ძველ საბუთთა განყოფილების ხელმძღვანელმა მანანა ჭუმბურიძემ კი კურსანტებს ეროვნულ არქივში დაცული უძველესი დოკუმენტები – ქართველ მეფეთა სიგელები და ხელნაწერები გააცნო. სწორედ ეროვნული არქივი ინახავს ერთ-ერთ უძველეს ისტორიულ საბუთს – მეფე დავით IV-ის ანდერძს შიომღვიმის მონასტრისადმი, რომლის შესახებაც გადაღებულ დოკუმენტური ფილმი „ნაშთი ძვირფასი სიგელ-გუჯრისა“ ფილმის ავტორმა, სამეცნიერო განყოფილების უფროსმა, ქეთევან ასათიანმა კურსანტებს ეროვნული არქივის კინოთეატრში თავად წარუდგინა.
აღსანიშნავია, რომ დავით აღმაშენებლის სახელობის ეროვნული თავდაცვის აკადემიის მსმენელები ეროვნულ არქივს უკვე მეორედ ესტუმრნენ.